حسينه ساپۍ: د رسنيو له آزادۍ څخه د ملاتړ په نړيوال ائتلاف کې غړيتوب، د بيان له آزادۍ څخه د افغانستان د حکومت د ملاتړ څرګندوى دى
د اطلاعاتو او فرهنګ وزارت سرپرستې حسينې ساپۍ د امريکا له آشنا غږ سره په مرکه کې د خبريالانو پر خلاف د تاوتريخوالي د موضوعګانو، د ښځينه خبريالانو د ستونزو، د بيان آزادۍ، اطلاعاتو ته د لاسرسي د قانون او د هغه د تطبيق په اړوند خبرې وکړې.
د باختر آژانس د خبرله مخې: د اطلاعاتو او فرهنګ وزارت سرپرستې د خبريالانو پرخلاف د تاوتريخوالي په اړه وويل چې په ٢٠١٩کال کې د خبريالانو پرخلاف تاوتريخوالي بيخي کمښت موندلى دى او هم هغه قضيې چې رامنځته شوې وې، په جديت سره د حکومت له لوري تعقيبې شوې دي.
په ٢٠١٩ کال کې په ټوليزه توګه د خبريالانو پرخلاف د تاوتريخوالي ١٠٥ قضيې څېړلې شوې دي چې زياترو قضيو ته رسيدګي شوې ده.
دغه راز د " نى" بنسټ هم اعلام وکړ چې په ٢٠١٩ کال کې په دغه بنسټ کې د تاوتريخوالي ١١٥ قضيې ثبتې شوې دي چې د تېرکال په پرتله ٤٢ سلنه کمښت ښيي.
حسينې ساپۍ د ښځينه خبريالانو د ستونزو په اړه زياته کړه چې اوس د رسنيو څه د پاسه ١٦٠٠ ژورناليستان او کارکوونکي ښځې دي چې له نېکه مرغه څه دپاسه ٧٠٠ يې مسلکي خبريالانې دي چې دغه شمېر له هيلو ډک دى.
د اطلاعاتو او فرهنګ وزارت سرپرستې ډاډ ورکړ چې د اطلاعاتو او فرهنګ وزارت د بيان آزادۍ ملاتړ کوي او د حکومت او رسنيو د ګډې کمېټې او د خونديتوب کمېټې په ګډون بنسټونه هم په دې برخه کې کار کوي.
دغه راز اطلاعاتو ته د لاسرسي قانون نافذ دى او د ټوليزو رسنيو د پاليسۍ مسوده برابره شوې ده.
کابل / دسلواغې ٩مه / باختر
