د اطلاعاتو او فرهنګ وزارت اعلامیه

د اطلاعاتو او فرهنګ وزارت اعلامیه
دوتار د افغانستان فرهنګي میراث دی. په وروستیو څو ورځوکې د ټولیزو رسنیو له لارې خبر شوي یوو چې د افغانستان او سیمې د موسیقۍ ناملموس فرهنګي میراث (دوتار) ګواکې ایران په نړیوالو فرهنګي میراثونو کې په خپل نوم ثبت کړی دی.
دوتار چې زیږد ځای یې هریوا یا اوسنی هرات دی او په ویدي او اوستايي سرودونو او همدارنګه شهنامه کې یې هم یادونه شوې ده.
موږ په سیمه کې له هېوادونو سره فرهنګي مشترکات لرو او همدارنګه د ورونو ملتونو په توګه د دغه فرهنګي تار په واسطه پېیل شوي یو؛ نو په همدې اساس باید ګډو فرهنګي ارزښتونو او همدارنګه د هېوادونو خپلو فرهنګي ارزښتونو او ویاړونو ته بشپړدرناوی ولرو.
د افغانستان اسلامي جمهوري دولت د اطلاعاتو او فرهنګ وزارت به د افغانستان د فرهنګ دوست او فرهنګپال ولس او همدارنګه د سیمې هېوادونو د ګډ فرهنګي میراث (دوتار) په اړه خپل وضاحت له اړوندو دلایلو او بشپړو معلوماتو سره د نړیوالو فرهنګي میراثونو ادارې ته له رسمي دیپلوماتیکي لارې واستوي، چې د موضوع په تړاو په هر اړخیزه توګه معلومات ترلاسه شي.
همدارنګه د اطلاعاتو او فرهنګ وزارت د افغانستان له فرهګپال ولس او په ځانګړي ډول د هرات له فرهنګیانو مننه کوي چې په دې اړه یې خپل غږ پورته کړ.
درنښت
د اطلاعاتو او فرهنګ وزارت رهبري
کابل/ د مرغومي١٠مه/ باختر