د پکتيا اطلاعاتو او کلتور ریاست له لوري ګلبڼ میاشتنۍ مشاعره ترسره شوه

تېره ورځ د پکتيا ولایت اطلاعاتو او کلتور رياست اړوند د هنر او کلتور مديريت له لوري د ګلبڼ مياشتنۍ مشاعره ترسره شوه.
د دغه ولایت د اطلاعاتو او کلتور رئيس قاضي ثواب جان اسلام يار د دغې مشاعرې په هکله وویل، چې دا ډول ادبي او فرهنګي ناستې د ځوانانو، د شعر مينوالو او شاعرانو لپاره يو ښه فرصت دی، تر څو ادبي او کلتوري فعاليتونه لا پياوړي او ژوندي وساتل شي.
د اطلاعاتو او کلتور رياست د هنر او کلتور آمر عقل خان وهاج د مشاعرې ګډونوالو ته د خبرو پرمهال وویل، چې دا ډول ادبي پروګرامونو جوړولو ته زیاته اړتیا لیدل کېږي، په همدې اساس اطلاعاتو او کلتور ریاست هره میاشت ګلبڼ ادبي مشاعره جوړوي، نوموړي له شاعرانو او فرهنګپالو څخه وغوښتل چې په مشاعره کې ګډون وکړي.
شاعرانو او د شعر مينوالو د اطلاعاتو او کلتور ریاست له رهبرۍ څخه مننه وکړه، چې د فرهنګپالو د يووالي او همغږۍ په موخه يې دغه مشاعره جوړه کړې وه. دوی زیاته کړه چې دا ډول مشاعرې او ادبي ناستې د فرهنګي هڅو لا غوړېدا لپاره خورا اړینې دي.
په دغه مشاعره کې ګڼ شمېر شاعرانو، ځوانانو او د شعر مينوالو ګډون کړی و، چې خپل ترتيب کړي شعرونه يې د مشاعرې ګډونوالو ته واورول.

۱۴۴۴/۱۲/۳ هــ ق
۱۴۰۲/۳/۳۱ هـ ش