د جوزجان د اطلاعاتو او کلتور رئيس د طلوع سعادت لوړو زده کړو موسسې له مشر سره وکتل
نن چهار شنبه (۱۴۴۴/۱۲/۳ هـ ق) د جوزجان ولايت د اطلاعاتو او کلتور رئيس مولوي سيف الدين معتصم د طلوع سعادت لوړو زده کړو موسسې له مشر سره په خپل کاري دفتر کې وکتل.
ښاغلي معتصم د طلوع سعادت لوړو زده کړو موسسې له مشر سره په لیدنه خوښي څرګنده کړه او ویې ویل، د نن ورځې ځوانان د پخوا په پرتله درس او زده کړو ته ډېره اړتیا لري، ځکه چې د هېواد راتلونکی د دوی په لاس کې دی او تعلیمي ادارې په دې برخه کې لوی مسؤلیت لري.
همدا راز د اطلاعاتو او کلتور ریاستونه په هېواد کې د اسلامي او افغاني کلتور د پياوړتيا او د ځوانانو د فکري ودې په برخه کې زياتې هڅې کوي.
ورپسې د طلوع سعادت د لوړو زده کړو موسسې رئیس عبدالحکیم الفت وویل، د ځوانانو او زده کوونکو د علمي ظرفیتونو د لوړولو په برخه کې د اسلامي امارت له مهمو او ګټورو پروګرامونو څخه ملاتړ کوو.
همدا راز د طلوع سعادت لوړو زده کړو موسسه د اطلاعاتو او کلتور ریاست سره په هره برخه کې هر اړخيزه همکاري کوي.
