فراه کې د رسنیو د اهمیت او ارزښت په نوم یو ورځنی روزنیز سیمینار ترسره شو

فراه کې د نهاوند علمي او فکري ادارې له لوري د اطلاعاتو او فرهنګ ریاست په همغږۍ د رسنیو د اهمیت او ارزښت په نوم ګڼ شمېر خبریالانو ته یو ورځنی روزنیز سیمینار ترسره شو، چې پکې د اطلاعاتو او فرهنګ ریاست مسؤلینو، د ولایتي ادارې استازو او د رسنیو مسؤلینو ګډون کړی و.
د اطلاعاتو او فرهنګ رئیس محمد عبدالحی سباوون وویل: د داسې سیمینارونو جوړول خلک له خپلو مسؤلیتونو سره بلدوي او له دندو سره د ريښتينوالي لامل ګرځي. د رسنیو مسؤلین، خبریالان او ځوانان باید د شریعت له لارښوونو سره سم خپلو موخو ته د رسېدو لپاره هڅې وکړي، نوموړي له ټولو ګډونوالو څخه وغوښتل، چې د رسنیو له امکاناتو څخه د ټولنې او نظام د ګټو لپاره کار واخلي.
ورته مهال سیمینار کې نورو ویناوالو هم خبرې وکړې او ویې ویل: د عامه افکارو د جوړولو په برخه کې د رسنیو رول خورا مهم دی، د رسنیو له لارې باید خلکو ته اسلامي لارښوونې ورسول شي.
ویناوالو د رسنیو له مسؤلينو او خبریالانو څخه وغوښتل؛ چې د اسلامي تمدن د خپرولو، د اصیل فرهنګ د ودې، د علم او پوهې د خپرولو، د بې ځايه او ناوړه تبلیغاتو پر وړاندې د مبارزې او د خلکو او حکومت ترمنځ د اړیکو د پیاوړتیا په برخو کې پوره هڅې وکړي.
د سیمینار ګډونوالو هم د دغه سیمینار له جوړولو څخه خوښي څرګنده کړه او د ورته نورو روزنیزو سیمینارونو د جوړیدو د غوښتنو ترڅنګ یې وویل؛ چې دا ډول سیمینار د حکومت او رسنیو ترمنځ د اړیکو په پیاوړتیا کې مرسته کوي.

۱۴۴۸/۵/۲ هـ ق