د ګرځندوی، مالي او اداري معين د سمنګان ولایت اړوند له تاريخي آبداتو او لرغونو سيمو څخه ليدنه وکړه
د اطلاعاتو او فرهنګ وزارت د ګرځندوی، مالي او اداري معين مولوي قدرتالله جمال، د يو پلاوي په مشرۍ سمنګان ولايت ته سفر وکړ او د دغه ولايت اړوند له يو شمېر تاريخي آبداتو، لرغونو سيمو او د اطلاعاتو او فرهنګ رياست له بېلابېلو برخو څخه يې ليدنه وکړه.
دغې ليدنې پر مهال، د سمنګان د اطلاعاتو او فرهنګ رييس سمنګان ولایت د تاريخي او فرهنګي میراثونو بډایه ولايت وباله او د دې ولايت د تاريخي آثارو د ساتنې او پالنې لپاره يې د لا زياتې پاملرنې غوښتنه وکړه.
دغه راز د فرهنګي ميراثونو د ساتنې مدير د یو شمېر لرغونو آبداتو د تاريخي مخینې په اړه معلومات وړاندې کړل او د تاريخي آبداتو او لرغونو سيمو د ساتنې او پالنې په برخه کې يې موجودې ستونزې او ننګونې له پلاوي سره شريکې کړې.
همدارنګه د ګرځندوی، مالي او اداري معین مولوي قدرتالله جمال له نږدې د لرغونو سيمو او تاريخي آبداتو وضعيت وڅېړه او د دغو ارزښتمنو ميراثونو د لا ښه ساتنې په موخه يې اړينې لارښوونې وکړې.
نوموړي د لرغونو سيمو د حدودو ټاکنې او ساتنې لپاره د تثبيتي لوحو پر نصب او د دغو سيمو د ځمکو د غصب د مخنيوي پر اړتیا ټينګار وکړ او د تاريخي ميراثونو په ساتنه کې يې د خلکو همکاري مهمه وبلله.
د اطلاعاتو او فرهنګ وزارت د ګرځندوی، مالي او اداري معين د تاريخي آبداتو ساتنه د دولت او ولس ګډ مسؤوليت وباله او د هېواد د تاريخي او فرهنګي هويت د ساتنې او پالنې لپاره يې پر جدي پاملرنې ټينګار وکړ.
۱۴۴۷/۱۲/۱ هـ ق
