کندز کې د شمال ختیځ زون په کچه د خبریالانو د همغږۍ غونډه وشوه

د کندز اطلاعاتو او کلتور ریاست او د افغان خبریالانو د خوندیتوب کمېټې په ګډو همکاریو د شمال ختیځ زون په کچه د خبریالانو د همغږۍ غونډه وشوه، چې پکې د دې ولایت د مقام د کارکوونکو چارو رئیس، د اطلاعاتو او کلتور رئیس، د افغان خبریالانو د خوندیتوب کمېټې استازو، د بغلان، بدخشان، تخار او کندز ولایتونو د سیمه‌ییزو رسنیو مسؤلینو او خبریالانو ګډون کړی و.
د اطلاعاتو او کلتور رئیس د رسنیو د ملاتړ په اړه خبرې وکړې او له ټولو خبریالانو څخه یې وغوښتل چې ملي ګټې په پام کې ونیسي او واقعیتونه رسنیز کړي.
نوموړي زیاته کړه، چې په کندز کې د خبریالانو او امارتي ادارو ترمنځ ښه همغږي شته او هڅې کېږي چې د د رسنیو او خبریالانو شته ستونزو ته رسېدنه وشي.
د غونډې په لړ کې د ولایت مقام د کارکوونکو چارو رئیس د رسنیو له مسؤلینو څخه وغوښتل چې په رسنیو کې ژمن او مسلکي کسان وګماري، ترڅو د اطلاع رسونې په برخه کې لا ډېرې اسانتیاوې رامنځته شي.
ورته مهال د افغان خبریالانو د خوندیتوب کمېټې سرپرست وویل: په اوسنیو شرایطو کې د اطلاع رسونې په برخه کې هېڅ ستونزه نشته او د خبریالانو او امارتي ادارو ترمنځ ښه همغږي موجوده ده.
د غونډې په پای کې یو شمېر خبریالانو او د رسنیو مسؤلینو خپلې ستونزې او وړاندیزونه شریک کړل، چې مسؤلینو یې د ستونزو د حل ډاډ څرګند کړ.

۱۴۴۷/۱۱/۴ هـ ق