د عامه کتابتونونو رئیس په ترکیه کې د اسلامي امارت لوی سفیر، فرهنګي آتشې او دیپلوماتانو سره ولیدل

د اطلاعاتو او کلتور وزارت د فرهنګ او هنر معینیت اړوند د عامه کتابتونونو رئیس دوکتور رفیع الله صمیم د ترکیې په انقرې ښار کې د اسلامي امارت لوی سفیر شیخ صنیع الله فرهمند، فرهنګي آتشې قاري حمیدالله تمکین او د سفارت له دیپلوماتانو سره ولیدل.
په دې لیدنه کې شیخ فرهمند د عامه کتابتون له رئیس څخه وغوښتل چې د پښتو، دري او نورو علمي سرچینو کتابونه د ترکيې جمهوریت (ملت کتابتون) ته د انتقال او ترکیه کې میشتو افغان زده کړیالانو لپاره اړین کتابونه برابرولو په برخه کې همکاري وکړي.
دغه راز دوکتور رفیع الله صمیم د دې لیدنې څخه خوښي څرګنده کړه او ډاډ یې ورکړ، چې د اړینو علمي سرچینو او کتابونو برابرولو او ترکیې هېواد ته یې د لیږولو په برخه کې د عامه کتابتونونو ریاست پوره چمتو دی.
همداراز، د عامه کتابتون رییس له محترم سفیر څخه غوښتنه وکړه، چې د ترکيې هېواد رسمي ادارو، په ځانګړي ډول له (TIKA) ادارې سره د راتلونکو لیدنو او اړیکو په لړ کې د هېواد په مرکز او ولایتونو کې د کتابتونونو د بیا رغونې او تجهیز په موخه د همکاریو د جلب موضوع مطرح او تعقیب کړي.
د لیدنې په پای کې محترم شیخ فرهمند د هر ډول لازمو همکارۍ ژمنه وکړه او د دوکتور صمیم سفر یې ترکیې هېواد ته ګټور او مؤثر وباله.
۱۴۴۷/۵/۲۹ هـ ق