د ځوانانو چارو معین لغمان ته د خپل سفر په لړ کې د فراشغان ولسوالۍ له ځوانانو سره ولیدل

د اطلاعاتو او کلتور وزارت د ځوانانو چارو معین مولوي محمد یونس راشد لغمان ته د خپل سفر په ترڅ کې د اطلاعاتو او کلتور ریاست د مسؤلینو په ملتیا د فراشغان ولسوالۍ اړوند د بېلابېلو سیمو له ځوانانو سره وکتل او د هغوی ستونزې او وړاندیزونه یې واورېدل. 
د فراشغان ولسوالۍ ځایي ځوانانو له ښاغلي معین صاحب څخه مننه وکړه، چې دغې سمیه ته راغلی او د ځوانانو ستونزې او وړاندیزونه له نږدې اوري، ځوانانو زیاته کړه، دوی ته د دندو پیدا کولو ترڅنګ د ظرفیت لوړونې، فکر جوړونې او زده کړو زمینې د برابرولو په برخو کې بېلابېل پروګرامونه جوړ شي. 
په ورته وخت کې د ځوانانو چارو معین مولوي محمد یونس راشد وویل: د هېواد په کچه د ځوانانو لپاره بېلابېل ګټور پروګرامونه پیل شوي دي او ډېر زر به د فراشغان ولسوالۍ ځوانان هم ورڅخه برخمن شي او د دې سیمې د ځوانانو ستونزو او وړاندیزونو ته به رسېدنه وشي.
ښاغلي راشد زیاته کړه، اسلامي امارت د اسلامي شریعت پلي کولو ته ژمن دی، یو شمېر هغه خلک چې د نظام په کړنو نیوکې لري، هغوی د نظام له پاليسیو او کړنو څخه خبر نه دي، اسلامي امارت ریښتینی اسلامي نظام پلي کوي او د راشیدینو خلیفه‌ګانو په قدمونو روان دی.
دغه راز د فراشغان ولسوال مولوي عبدالمومن منقعد د ځوانانو چارو له معین څخه مننه وکړه، چې دغې لرې پرتې ولسوالۍ ته راغلی او د ځوانانو ستونزې له نږدې اوري، فراشغان یوه لرې پرته ولسوالي ده، دا چې اوس مهال مشران دې سیمې ته راځي او د ولسونو ستونزې اوري د ویاړ او افتخار ځای دی.
۱۴۴۷/۴/۱۸ هـ ق