لوګر کې د کتاب یو ورځنی نندارتون جوړ شو
د لوګر ولايت د اطلاعاتو او کلتور ریاست له لوري پل علم ښار کې د يو ورځني نندارتون په ترڅ کې د عامه کتابتون په ګډون د خصوصي کتاب پلورنځیو بېلابېل کتابونه هم نندارې ته وړاندې شوي وو.
د نندارتون پرانیستلو پر مهال د اطلاعاتو او کلتور ریاست د رئیس دوکتور رفیع الله صمیم ترڅنګ د یو شمېر ادارو استازو، د خصوصي کتاب پلورنځیو مسؤلینو، علماوو، زده کړیالانو، زده کوونکو او ځوانانو ګډون کړی وو.
مسؤلينو د نندارتون جوړېدو موخه په ټولنه کې د مطالعې دود پراختیا او ځوانان مطالعې ته هڅول وبلل او زیاته یې کړه؛ له کتاب او مطالعې سره مینه د یوې ټولنې د پرمختګ سبب کیږي، د اسلامي امارت له بیا ځلې حاکمیت سره په دې ولایت کې د ځوانانو، زده کړیالانو، زده کوونکو او خلکو ترمنځ د کتاب مطالعې دود پرمختګ کړی، په یاد نندارتون کې د کتاب او مطالعې د مینه والو لپاره د خصوصي کتاب پلورنځیو له لوري شل سلنه تخفیف هم په پام کې نیول شوي وو.
د نندارتون څو تنو ګډونوالو د اطلاعاتو او کلتور ریاست هڅې وستايلې او ويې ویل: دا ډول نندارتونونه کولای شي، د ځوانانو ترمنځ د مطالعې دود غښتلی کړي او په ټولنه کې له کتاب سره علاقه مندي زياته کړي.
