د رسنيو د شکايتونو او سرغړونو د څېړنې کمېسيون نوبتي غونډه وشوه
یکشنبه ( ۲۹ د شوال المکرم ۱۴۴۶) د اطلاعاتو او کلتور وزارت په خپرونو چارو معينيت کې د یاد معينيت د معين ښاغلي مهاجر فراهي په مشرۍ د رسنيو د شکايتونو او سرغړونو د څېړنې کميسيون نوبتي غونډه وشوه، چې اطلاعاتو ته د لاسرسي رياست رئيس مولوي رحمت الله نړيوال، د افغانستان د ازادو خبريالانو د ټولنې مشر حجت الله مجددي او د کميسيون نورو غړو هم پکښې ګډون درلود.
د غونډې په پيل کې د خپرونو چارو معين مهاجر فراهي د تېرو غونډو د پرېکړو او موضوعاتو ارزونه وکړه، ورپسې د ځينو رسنيو له لوري د رالېږل شويو شکايتونه وڅېړل شول، چې په ترڅ کې يې د جهان راډيو د ستونزې هواري لپاره کمېټه وټاکل شوه، تر څنګ يې د راه فردا تلويزيون او کارکوونکو تر منځ يې د رامنځته شوې ستونزې په اړه بحث وشو، همدارنګه د داخلي رسنيو د ملاتړ په موخه د سوداګريزو اعلاناتو شريکولو موضوع ته د رسېدنې سربېره په څو نورو موضوعاتو هم بحث وشو او په اړه يې لازمې پرېکړې وشوې.
د یادونې وړ ده، چې د رسنيو د شکايتونو او سرغړونو د څېړنې کمېسيون په رسنيز ډګر کې د رامنځته شويو ستونزو د حل کولو په موخه رامنځته شوی، چې په نوبتي شکل د کمېسيون د غړو په موجوديت کې غونډې کوي، رالېږل شوي شکايتونه او رسنيزې سرغړونې څيړي او په اړه يې لازمې پرېکړې کوي.
