د اطلاعاتو او فرهنګ وزارت اعلاميه
پارک سينما زموږ د هېواد له مهمو فرهنګي، هنري او تاريخي ميراثونو څخه ده. د پارک سينما او د افغانستان د نورو سينماګانو له لارې ، د هېواد اوسېدونکي له فلم، سريال او نورو هنري نمايشاتو سره آشنا شول. د پارک سينما له عمر څخه نږدې ٧٠ کاله تېرېږي او اوس د فرهنګي ميراثونو يوه برخه شمېرل کېږي چې بايد وساتل شي، که څه هم په تېرو کلونوکې، په څنډه کې د اطلاعاتو او فرهنګ وزارت د پاتې کېدو په دليل، د سينماګانو مديريت ښاروالۍ ته وسپارل شو او دغه روال لا هم دوام لري.
کابل ښاروالۍ په دې وروستيو کې په يوه غونډه کې د جمهوري رياست جلالتماب لومړي مرستيال د پارک سينما د ويجاړولو طرحه ورکړې ده او په ښکاره دغه غوښتنه د تائيد وړ ګرځيدلې او تصویب شوې ده.
د اطلاعاتو او فرهنګ وزارت له کابل ښاروالۍ څخه غواړي چې په دې برخه کې لږ ځنډ او صبر وکړي او د جمهوري رياست له جلالتمآب لومړي مرستيال څخه هيله کوي چې د غونډې پر پرېکړې بيا کتنه وشي. که وګڼو چې د پارک له سينما څخه استفاده نه کېږي، خو بيا هم د هېواد د هنرمندانو د خاطرو يوه برخه ده او د ساتنې وړ مهم فرهنګي ميراث دی. د هغې تخريب په هېڅ ډول د عمومي افکارو او ښاريانو د منلو وړ نه دی.
د اطلاعاتو او فرهنګ وزارت غواړي چې د سينماګانو او د پارک سينما د مديريت موضوع د فرهنګ عالي شورا په لومړنۍ غونډه کې تر بحث لاندې ونيول شي. وروستي تصميمونه به د فرهنګ عالي شورا ونيسي.
کابل/ د لړم ١٩ مه / باختر
