د ګرځندوی، مالي او اداري چارو معين بلخ ولايت ته سفر وکړ
د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال د پلاوي په ملتیا بلخ ولايت ته د خپل سفر په ترڅ کې د بلخ ولايت له والي الحاج ملا محمد یوسف وفا او د دې ولايت د اطلاعاتو او کلتور له رئيس مولوي محمدالله ضرار سره وکتل.
په ياده کتنه کي د بلخ ولايت رسنيو پر فعاليتونو، د ولايتي ادارې او د اطلاعاتو او کلتور رياست ترمنځ پر همږغۍ، بلخ ولايت ته د راتلونکو سيلانيانو او دې ته ورته يو شمېر نورو موضوعاتو خبري وشوې.
په پيل کي مولوي قدرت الله جمال خبري وکړې او ويې ويل: بلخ ولايت ته مو د سفر موخه د ولايت مقام او اطلاعاتو او کلتور رياست ترمنځ همږغي، د اطلاعاتو او کلتور رياست د ټولو اداري چارو، وسايلو، امکاناتو، د ياد رياست د کارکوونکو چاري ارزونه، د نژدې څخه ليدنه او د دوی ستونزي اورېدل او ستونزو يې ته رسېدنه ياد کړل.
ښاغلي جمال د خپلو خبرو په دوام وويل: الحمدلله د اسلامي امارت په راتګ سره د اطلاعاتو او کلتور وزارت په عايداتي وزارت بدل شوی دی، افغانستان په هر ولايت کي تاريخي او کلتوري سيمي لري چې د هېواد د داخلي سيلانيانو ترڅنګ يې د خارجي سيلانيانو توجه جلب کړې ده او په دغه ځايونو کې پانګوونه کوي، اسلامي امارت د سيلانيانو لپاره هرډول آسانتياوي رامنځته کړي دي.
ورپسې د بلخ ولايت والي الحاج ملا محمد یوسف وفا ياد پلاوي ته ښه راغلاست ووايه او ويې ويل: د افغانستان کلتوري او فرهنګي دود د ولايتونو ترمنځ خلکو ته رسول ډېر مهم دي، د دې ولس ذهنيت جوړول، فرهنګي او کلتوري خپروني جوړول، د نظام او اسلامي امارت لاسته راوړني، پرمختګونه او ښېګڼي بايد د رسنيو له لاري تر ولس پوري ورسيږي او ټولو ته د همدې لاري عامه پوهاوي ورکړل شي.
ښاغلي وفا صاحب زياته کړه: د بلخ ولايت ټول تاريخي او لرغوني ځايونو تاريخ بايد ژوندی وساتل شي او د دې ولايت تاريخ بايد د کتاب په شکل وليکل شي ځکه د افغانستان پنځه زره کلن تاریخ د همدې بلخ ولايت څخه ياديږي.
الحاج ملا محمد یوسف وفا د ناستي په ورستيو کي راغلي پلاوي ته د ولايتي ادارې په استازيتوب د هرډول همکارۍ ډاډ ورکړ.
۱۴۰۳/۱۲/۲ ھـ ش
۲۰۲۵/۲/۲۰ زېږديز
