محمد طاهر زهير: د بريښنايي تذکرو وېش له نړېوالې ټولنې سره د حکومت د ژمنو يوه برخه ده
د اطلاعاتو او فرهنګ وزارت کارکوونکو ته د بريښنايي تذکرو د ويشلو بهير نن پاى ته ورسېد. د باختر اژانس د خبرله مخې؛ په هغې غونډه کې چې په همدې مناسبت جوړه شوې وه د اطلاعاتو او فرهنګ وزارت سرپرست محمد طاهر زهير وويل چې د بريښنايي تذکرو ويشل يو ملي بهير او له نړيوالې تولنې سره د حکومت د ژمنو يوه برخه ده. د اطلاعاتو او فرهنګ وزارت سرپرست زياته کړه چې بريښنايي تذکرې په ښې حکومتوالى، رڼو انتخاباتو او له فساد سره په مبارزه کې مهم رول لري. محمد طاهر زهير زياته کړه چې د اطلاعاتو او فرهنګ وزارت يو شمېر کارکوونکو د تخنيکي ستونزو له امله بريښنايي تذکرې نه دي ترلاسه کړي او کولاى شي په راتلونکې دوره کې تذکرې ترلاسه کړي. د غونډې په پاى کې د احصاييې د مرکزي ادارې کارکوونکو ته چې د بريښنايي تذکرو په ويشلو کې يې همکارى کړې وه د مننې لوحه ورکړ شوه.
کابل / د لړم ١٢مه / باختر
