د خصوصي ښوونیزو مرکزونو د زده کوونکو ترمنځ د اخیستل شوې سیرت النبي سیالۍ ازموینې پایلې اعلان شوې
دو شنبه ( ۲۲ درمضان المبارک ۱۴۴۵ ) د پکتیا ولایت اطلاعاتو او کلتور ریاست اړوند د ځوانانو چارو آمریت لخوا د بيلابيلو خصوصي کورسونو ښوونیزو مرکزونو زده کوونکو ترمنځ د اخیستل شوې سیرت النبي سیالۍ ازموینې پایلې اعلان شوې.
د اطلاعاتو او کلتور رئیس مولوي ثواب جان اسلام یار د یادې سیالۍ پایلو اعلان پرمهال د رسول الله صلی الله علیه وسلم په سیرت باندې خبرې وکړې او زياته يې کړه؛ چې د رسول الله صلی الله علیه وسلم سیرت څخه باید ټول ځانونه خبر کړو، چې څه ډول حضرت محمد صلی الله علیه وسلم ژوند کړی، ټولنه يې څنګه رهبري کړې او د اسلام مبارک دین په رسولو کې يې څه ډول چلند او سیاست څخه کار اخیستی دی.
د اطلاعاتو او کلتور ریاست د ځوانانو چارو آمر اصف الرحمن خپلواک د رسول الله صلی الله علیه وسلم په سیرت باندې دخبرو ترڅنګ زیاته کړه؛ چې د زده کوونکو او ځوانانو فکري روزنې لپاره مختلف پروګرامونه لري او د هغوی لپاره د زده کړو زمینې برابروي. نوموړي زده کوونکو او ځوانانو څخه غوښتنه وکړه، چې په راتلوونکو نورو سیالیو کې هم پراخه برخه واخلي.
د یادولو وړ ده، چې د دغې سیالۍ لومړۍ مقام ګټوونکی حبیب الرحمن، دویم فیصل او دریم محب الله په نومونو ؤ، چې په یو شمېر ډالیو باندې وستایل شول.
