په هلمند کې د نبوي سیرت سیالي ترسره شوه
تېره ورځ په هلمند ولایت کې د اطلاعاتو او کلتور ریاست اړوند د ځوانانو چارو مدیریت لخوا د سیرت النبي سیالي ترسره شوه، چې پکې ۶۰ تنه زده کوونکو ګډون کړی و.
د ځوانانو چارو مدیر قاري عبدالباري حنظله وایي، دغه ډول سیالۍ به زموږ نوی نسل وهڅوي تر څو د خپل خوږ پیغمبر صلی الله علیه وسلم ژوند مطالعه کړي او د هغه سیرت او صورت په خپل ژوند کې عملي کړي.
د ځوانانو د پرمختګ مدیر وایي، د دغه سیالیو پايلې به ډیر ژر اعلان شي، تر کوچني اختر وروسته به په یوه شانداره پروګرام کې ګټوونکو او د لومړي، دوهم او دریم مقام ترلاسه کوونکو ته جایزې ورکړل شي.
د یادونې وړ ده چې د ځوانانو مدیریت تر دې وړاندې هم د ځوانانو د پرمختګ او علمي سطحې لوړونې په موخه بېلابېلې سیالۍ ترسره کړې دي.
۱۴۴۴/۹/۱۸ هـ ق
۱۴۰۲/۱/۲۰ هـ ش
