د رسنیو مسؤلینو، خبریالانو او د امارتي ادارو له ویاندویانو سره د همغږۍ ناستې وشوې
د پکتیا او کندوز ولایتونو د اطلاعاتو او فرهنګ ریاستونو له لوري د د اطلاع رسونې بهیر لا ښه والي او د رسنیو او خبریالانو د ستونزو اوریدو په موخه د رسنیو له مسؤلینو، خبریالانو او د امارتي ادارو له ویاندویانو سره د همغږۍ ناستې وشوې.
مسؤلینو وویل: اطلاعاتو ته د لاسرسي په برخه کې د پخوا په پرتله د پام وړ پرمختګونه شوي دي، له نېکه مرغه اوس مهال د خبریالانو او د امارتي ادارو ترمنځ د همغږۍ فضا پیاوړې شوې او په دې برخه کې د لا ښه پرمختګ لپاره عملي او اغېزمن ګامونه اخیستل کېږي.
د مسؤلینو په وینا د اطلاعاتو او فرهنګ ریاست د خبریالانو او رسنیو له استازو سره د ښې همغږۍ، متقابل تفاهم او اطلاعاتو ته د لاسرسي حق د پیاوړتیا لپاره د تل په څېر خپلو همکاریو ته ژمن دی او د رسنیو او ادارو ترمنځ سالمه همغږي د باور جوړونې او ولسونو ته د سالم اطلاعرسونې په برخه کې مهم ارزښت لري.
په ناستو کې د رسنیو مسؤلینو، خبریالانو او د امارتي ادارو ویاندویانو خپلې ستونزې او وړاندیزونه له مسؤلینو سره شریکې کړې، چې د مسؤلینو له لوري د ستونزو د حل او وړاندیزونو ته د رسیدو ډاډ څرګند شو.
۱۴۴۷/۱۲/۳ هـ ق
