پکتیکا او سرپل ولایتونو کې خبریالانو ته یو ورځنی روزنیز سیمینار وړاندې شو
د پکتیکا او سرپل اطلاعاتو او کلتور ریاستونو او د یادو ولایتونو د خپلواکو خبریالانو ټولنې په همکارۍ د سیمیزو رسنیو مسؤلینو، خبریالانو او د ولایتي ادارو ویاندویانو ته یو ورځنی روزنیز سمینار وړاندې شو.
مسؤلینو د سیمینار جوړول یو ارزښتمند او اړین ګام وباله او ویې ویل: رسنۍ د ولسونو او نظام ترمنځ د اړیکو پل دی او د عامه پوهاوي ستر مسئولیت پر غاړه لري، خبریالان باید د اقلیمي بدلون، روغتیا او ډیجیټلي خوندیتوب په برخو کې بشپړه پوهه ولري، تر څو وکولای شي کره، ګټور او مسئولانه معلومات خلکو ته ورسوي.
د مسؤلينو په وينا؛ په راتلونکې کې به د رسنیو مسؤلینو، خبریالانو او د امارتي ادارو ویاندویانو ته ورته نور سیمینارونه هم جوړ کړي.
د رسنیو مسؤلینو، خبریالانو او د امارتي ادارو ویاندویانو د دې سیمینار د جوړېدو څخه خوښي څرګنده کړه او دا یې د ظرفیت د لوړولو او د پېښو د انعکاس د کیفیت د ښه والي لپاره غوره اقدام وباله او په راتلونکي کې د دا ډول نورو پروګرامونو جوړولو د دوام غوښتونکي شول.
په یاد سیمینار کې د چاپېریال ساتنې، روغتیایي خبریالۍ، حقیقت موندنې او ډیجیټل خوندیتوب په اړه معلومات وړاندې شول.
۱۴۴۷/۸/۲۴ هـ ق
