په سیاګرد (غوربند) ولسوالۍ کې د تاریخي سیمو د ساتنې په اړه غونډه وشوه.
د پروان ولایت د اطلاعاتو او فرهنګ ریاست له لوري په سیاګرد (غوربند) ولسوالۍ کې د تاریخي سیمو د ساتنې په اړه غونډه وشوه. چې پکې د سیاګرد ولسوال، د پروان ولایت مقام استازي، د دې ولسوالۍ د یو شمېر ادارو استازو او د بېلابېلو سیمو مشرانو ګډون کړی و.
د پروان د اطلاعاتو او فرهنګ ریاست د فرهنګ او ګرځندوی آمر وویل: د تاریخي سیمو ساتنه د حکومت او ولسونو ګډ مسٶليت دى او دغه ځايونه د یوه ملت ملي میراث دی، همدارنګه د اطلاعاتو او فرهنګ ریاست ژمن دی چې د عالیقدر امیرالمؤمنین (حفظه الله) د تاریخي سیمو او آثارو د ساتنې اړوند فرمان په بشپړه توګه پلي کړي او د اړتیا وړ تاریخي سیمو د بیارغونې لپاره هڅې کوي.
د فرهنګ او ګرځندوی آمر د سیمې له مشرانو څخه وغوښتل؛ د تاریخي ځایونو د تثبیت او ثبت په برخه کې له اطلاعاتو او فرهنګ ریاست سره همکاري وکړي او په تاریخي ځایونو کې د غیر قانوني کیندنو مخنیوی وکړي.
دغه راز د سیاګرد ولسوال د دې ولسوالۍ د ټولو ملکي او نظامي ادارو په استازوالۍ د تاریخي سیمو ساتنه مهمه وبلله او ژمنه یې وکړه، چې د ټولې اړوندې اداره به په دې برخه کې د اطلاعاتو او فرهنګ ریاست سره پوره همکاري وکړي.
۱۴۴۸/۱/۲۱ هـ ق