د سیمهییزو رسنیو او مطبوعاتي مسؤولینو سره د همغږۍ ناسته وشوه
د غور د اطلاعاتو او فرهنګ ریاست له لوري د لا زیاتې همغږۍ، پر وخت او دقیقو معلوماتو د رسولو په موخه د سیمهییزو رسنیو له مسؤلینو او د امارتي ادارو له مطبوعاتي مسؤولینو سره د همغږۍ ناسته وشوه.
په دې غونډه کې د اطلاعاتو او فرهنګ رئیس د رسنیو ستونزو د ارزولو ترڅنګ رسنیو ته د اړیکو چینلونو له لارې د معلوماتو رسولو پر څرنګوالي او د اطلاعرسونې پر وضعیت هم خبرې وکړې او ډاډ یې څرګند کړ، چې په دې برخه کې هڅې روانې دي، ترڅو د معلوماتو د شریکولو په بهیر کې هېڅ ډول ځنډ او خنډ رامنځته نه شي.
غونډه کې مطبوعاتي مسؤولینو هم د موضوع په اړه خپلې خبرې وکړې او ډاډ یې څرګند کړ، چې د اطلاعرسونې بهیر د ښه والي لپاره به پوره هڅې وکړي، ترڅو رسنیو ته معلومات پر خپل وخت او له باوري سرچینو څخه ورسېږي.
مطبوعاتي مسؤولینو د اطلاعرسونې د پیاوړتیا او رسنیو ته د معتبرو معلوماتو د پر وخت لاسرسي لپاره د خپلو دوامداره هڅو ډاډ څرګند کړ.
همدارنګه، په غور ولایت کې د افغان خبریالانو د خوندیتوب کمېټې مسؤول او د رسنیو مسؤولینو د سیمهییزې ادارو په ځانګړې توګه د اطلاعاتو او فرهنګ ریاست له همکاریو څخه مننه وکړه او د امارتي ادارو د لاسته راوړونو او د خلکو د ستونزو پر مسؤولانه انعکاس یې ټینګار وکړ.
۱۴۴۸/۱/۲۰ هـ ق