په یمګان ولسوالۍ کې د حکیم ناصر خسرو د تاریخي مقبرې معیاري ترمیم او بیارغونه بشپړه شوه
د بدخشان ولایت د اطلاعاتو او کلتور ریاست چارواکي وایي چې د یمګان ولسوالۍ په حضرت سید سیمه کې د حکیم ناصر خسرو تاریخي مقبره د لومړي ځل لپاره په معیاري ډول ترمیم او بیا ورغول شوه.
د اطلاعاتو او کلتور رئیس انجینر ذبیح الله امیري وویل: د ناصر خسرو مقبره د طبیعي او غیر طبیعي پېښو له امله د ویجاړېدو په حال کې وه، خو د اطلاعاتو او کلتور وزارت په همکارۍ او د آغا خان فرهنګي بنسټ د مالي او تخنیکي ملاتړ په واسطه د څلورو میاشتو په موده کې په معیاري ډول ورغول شوه.
هغه زیاته کړه؛ د ناصر خسرو مقبرې ترڅنګ، په یمګان ولسوالۍ کې د "ملا برات تاریخي مدرسه" هم د یاد بنسټ په مرسته رغول شوې ده.
د بدخشان ولایت فرهنګیان حکیم ناصر خسرو د سلجوقي دورې نامتو شاعر او لیکوال بولي، چې مقبره یې د ۹۰۰ کلونو تاریخچه لري او د افغانستان له مهمو تاریخي میراثونو څخه شمېرل کېږي.
۱۴۴۶/۶/۵ هـ ق
۱۴۰۳/۹/۱۷ هـ ل
