هرات کې د ورزشي خبريالانو نړيواله ورځ ولمانځل شوه
سهشنبه (۲۵ د ذوالحجې ۱۴۴۵) هرات ولایت کې د جولای دوهمه نېټه چې د ورزشي خبريالانو د نړيوالې ورځې سره برابره ده، د يو لړ مراسمو په ترڅ کې ورزشي خبريالانو ته د ستاينليکونو او ډاليو په ورکولو سره ولمانځل شوه.
د هرات ولايت د اطلاعاتو او کلتور رياست د اطلاعاتو آمر فريد احمد ایوبي په خپلو خبرو کې ورزشي خبريالي مهمه وبلله او ويې ويل: د اطلاعاتو او کلتور رياست مسؤلين هڅې کوي، تر څو د رسنيو او خبريالانو ستونزې په بشپړ ډول له منځه يوسي.
د هرات د رسنيو څخه د څارنې او ملاتړ کميټې غړي شميل احمد مشعل دې ولايت کې د ورزش د پرمختګ په برخه کې د ورزشي خبريالانو فعاليتونه مهم وبلل او زياته يې کړه؛ د رسنيو د څارنې او ملاتړ کميټه هڅه کوي، تر څو ورزشي اطلاعاتو ته د لاسرسي په برخه کې د اسانتياو رامنځته کولو ترڅنګ خبريالانو ته د ظرفيت لوړونې سمينارونه هم جوړ کړي.
۱۴۰۳/۴/۱۳ ھ ش
۲۰۲۴/۷/۳ ميلادي
