افغانستان او جاپان دیپلوماتیکې اړیکې د متقابل احترام پر بنسټ ولاړې دي

تېره ورځ یکشنبه (۸ د شعبان ۱۴۴۵ هـ ق کال) د اطلاعاتو او کلتور وزارت سرپرست وزیر ملا خیرالله خیرخواه په خپل کاري دفتر کې د جاپان له سفیر تکه یوشي کیورومي سره ولیدل.

په پیل کې د جاپان سفیر د ۵۴ میلیون ډالرو مرستې څخه یادونه وکړه او د ا.ا.ا  په بېلا بېلو برخو؛ د امنیت تامین، د مخدره موادو سره د مبارزې، د اداري فساد او اقتصادي پرمختګ او نور فعالیتونو په اړه یې د حکومت چټک ګامونه و ستايل او دا يې مهم ګامونه وبلل.

همدارنګه تکه یوشي کیورومي  وویل؛ هېواد یې غواړي چې د ا.ا.ا سره مثبتي اړیکې ولري او اوس د دې وخت را رسېدلی چې نړۍ له افغانستان سره تعامل وکړي.

سربېره پر دې د جاپان سفیر د تاریخې آثارو د ساتنې، بیارغونې او ملي موزیم په برخه کې د مرستې ډاد ورکړ.

ور پسې د اطلاعاتو او کلتور وزارت سرپرست وزیر ملا خیرالله خیرخواه د افغانستان په بیا رغونه او نیکو دیپلوماتیکو اړیکو کې د جاپان د سفیر له مرستې مننه وکړه او زیاته یې کړه د تاریخي اثارو ساتنه د ټولو ګډ مسؤلیت دی، باید یو له بل سره همکار پاته سو.