د اطلاعاتو او کلتور وزارت سرپرست د کندهار له والي سره وکتل

 تېره ورځ د  اطلاعاتو او کلتور وزارت سرپرست ملا خيرالله خیرخواه د خپل کاري سفر په ترڅ کې د کندهار له والي حاجي ملا شيرين آخند سره وکتل. 

په پېل کې کې ښاغلي والي صاحب د محترم وزير صاحب په ليدلو خوښي وښوده او له خيرخواه صاحب سره کندهار کې د اطلاعاتو او کلتور ریاست پر فعالیتونو خبرې وکړې، هغه هلته د یاد ریاست پرمختګونه او نوښتونه وستایل او زیاته یې کړه، چې لا باید په کلتوري برخه کې نوښتونه رامنځته شي، ددې ترڅنګ یې د ولایت مقام لخوا د همکارۍ ډاد وړاندي کړ. 

وروسته ښاغلي خیرخواه صاحب د دوی له هر اړخېزې همکارۍ مننه وکړه.
او زیاته یې کړه، د کندهار د اطلاعاتو او کلتور ریاست فعالیتونه په ښه شکل روان، ښاغلي خيرخواه صاحب د یو شمېر تاریخي آبدو د ترمیم په اړه هم معلومات شریک کړل، چې په خبره یې د حاجي میرویس خان نیکه د مقبرې او احمدشاه بابا کور او مقبرې د ترمیم کارونه په ښه ډول روان دي، ښاغلي خیرخواه خوښي وښوده، چې د ا.ا.ا. په راتګ سره زرګونو بهرنیو سېلانیانو د هېواد د بېلا بېلو برخو په ځانګړې توګه کندهار څخه لیدنه کړي.

۱۴۴۵/۵/۱ هـ ق
۱۴۰۲/۸/۲۴ هـ ش