پوهاند باوري دافغانستان اوترکيې ترمنځ دفرهنګي اړيکو په پراختيا باندې ټينګار وکړ

داطلاعاتواوفرهنګ وزارت دفرهنګ او هنر معين پوهاند محمد رسول باوري نن په کابل کې دترکيې دسفارت له دويم سکرترسره په کتنه کې د دواړو هېوادونو ترمنځ دفرهنګي اړيکو په پراختيا باندې ټينګار وکړ .
دباختراژانس دخبريال دخبرله مخې ، په دې کتنه کې دهغه فرهنګي هوکړه ليک دلاسليک په اړوند چې مسوده يې دترکيې دسفارت ددويم سکرتر  له لوري پوهاند باوري ته وسپارل شو ،په کابل کې دترکيې د فرهنګي مرکز دجوړولو چې وروسته به دهېواد په کچه فعاليت وکړي او دواړو هېوادونو ترمنځ د فرهنګي اړيکو دپراختيا په اړوند خبرې وشوې .
پوهاند باوري ټينګار وکړ چې دترکيې دتيکا بنسټ بايد په فرهنګي برخو په تېره بيا دهېواد دفرهنګي ابداتو دترميم په برخه کې داطلاعاتواوفرهنګ له وزارت سره په مشوره  اوهمغږى کې ترسره کړي .
په کابل کې دترکيې دسفارت دويم سکرتر  له افغانستان سره په تېره بيا په فرهنګي برخه کې  دخپل هېواد دهمکاريو ډاډ ورکړ او څرګنده يې کړه چې ترکيه غواړي په فرهنګي برخه کې خپلې همکارى دافغانستان ټولو ولايتونو ته پراخې کړي او داطلاعاتواوفرهنګ وزارت له همکارى  څخه يې مننه وکړه.

کابل / دمرغومي ١٣مه / باختر