په تخار کې د حکومت او رسنیو ترمنځ د همغږۍ ناسته تر سره شوه
نن دوشنبه (۱۴۴۵/۴/۱ هـ ش) د تخار ولایت په اطلاعاتو او کلتور ریاست کې د حکومت او رسنیو ترمنځ د همغږۍ ناسته تر سره شوه.
په یاده ناسته کې د تخار ولایت د اطلاعاتو او کلتور رئيس مولوي ذبيح الله انصاري، د امنيې قوماندانۍ د مطبوعاتو مسؤلينو، د ولايت مقام استازي، د امر بالمعروف او نهي عن المنکر استازي، خبریالانو او د رسنیو مسؤلینو ګډون کړی وو.
د غونډې په پیل کې د افغان خبریالانو د مصؤنیت کمېټې مسؤل عبدالسمیع خاوري د رسنیو د تېرې یوې میاشتې ستونزې او لاسته راوړنې د غونډې له ګډون والو سره شریکې کړې او د ستونزو د حل غوښتنه یې وکړه.
ورپسې سیمه ييزو خبريالانو په وار سره خپل نظرونه بیان کړل، اطلاعاتو ته د لاسرسي وضعيت يې د پخوا په پرتله ښه وباله او د دغه ولايت د سيمه ييزو رسنيو تر منځ يې د لا زياتې همغږۍ غوښتنه وکړه.
ورپسې د اطلاعاتو او کلتور رئيس مولوي ذبيح الله انصاري د رسنیو مسؤلینو ته د ستونزو د حل په برخه کې د هر راز همکاریو ډاډ ورکړ او له دوی یې وغوښتل چې خپل نشرات د اسلامي او افغاني ارزښتونو په پام کې نیولو سره مخ ته یوسي.
