د اطلاعاتو او کلتور وزیر د جاپان له سفیر ښاغلي تاکاشي اوکادا سره وکتل

تېره ورځ د اطلاعاتو او کلتور وزارت وزیر ملا خيرالله خیرخواه د جاپان له سفیر ښاغلي تاکاشي اوکادا سره په خپل کاري دفتر کې وکتل. 
په یاده کتنه کې د ښاغلي اوکادا له لوري د اسلامي امارت په هڅو د رامنځته شوي امنیت، مخدره توکو سره پیاوړې مبارزه او د اقتصادي ودې په برخو کې مثبتې لاسته راوړنې وستایلې او دا یې غوره ګام یاد کړ.
نوموړي وویل: غواړم د خپل هېواد ژمنه بیا تازه کړم، موږ دې ته لېواله یو، ترڅو له اسلامي امارت سره غوره اړیکي وساتو او زیاته یې کړه، وخت رارسېدلی چې نړۍ او افغانستان یو تعامل ته سره ورسېږي او موږ په دې برخه کې ستاسو سره پوره همکار یو. 
د دې ترڅنګ ښاغلي اوکادا په افغانستان کې د تاریخي آثارو پر شتون خبرې وکړې او زیاته یې کړه، موږ چمتو یو چې دلته د تاریخي آثارو په ساتنه او رغونه کې له افغان حکومت سره همکار پاتې شو.
نوموړي همدا راز د افغانستان د ملي موزیم سره د همکارۍ چمتووالی وښود.  
ورپسې د اطلاعاتو او کلتور وزیر محترم ملا خيرالله خیرخواه تاکاشي اوکادا ته د ښه راغلاست ترڅنګ د افغانستان او جاپان هېواد ډيپلوماتیکې اړیکې غوره وبللې او زیاته یې کړه، دلته د څو ښوونځیو د رغونې او په ځینو نورو برخو کې د یاد هېواد له همکارۍ مننه کوو. 
د دې ترڅنګ خیرخواه صاحب وویل: افغانستان ډېر مهم تاریخي آثار لري ټول یې باید په ساتنه کې په ښه توګه خپل مسؤلیت ادا کړو.

۱۴۴۴/۳/۳۰ هـ ق
۱۴۰۲/۷/۲۳ هـ ش