هرات کې د معارف سړک د اتفاق اسلام په نوم ونومول شو
تېره ورځ د هرات د اطلاعاتو او کلتور رياست له لوري د ښاروالۍ د فرهنګي استازي په شتون کې د معارف سړک چې د مولانا تالار په سړک هم مشهور و، د اتفاق اسلام په نامه ونومول شو.
د اطلاعاتو او کلتور رئيس مولوي نعيم الحق حقاني وايي: اتفاق اسلام د هرات څخه خپرېدونکې تاريخي ورځپاڼه ده چې ددې سړک د نوم تغير کول هم د خپلو تاريخي ميراثونو د ساتنې په معنی ده.
نوموړي د اتفاق اسلام لوحې د لګولو پر وخت د ښاروالۍ څخه مننه وکړه او ويې ويل: د فرهنګي او تاريخي ميراثونو په نومونو سره د سړکونو نومول به اينده نسلونه د خپلو فرهنګي او تاريخي ميراثونو څخه باخبره وساتي.
د اتفاق اسلام سړک د معارف له دروازې شروع او د محبس تر سړکه امتداد لري.
۱۴۴۵/۳/۵ هـ ق
۱۴۰۲/۶/۲۹ هـ ش
