پوهاند محمد رسول باوري د بلخ ولسوالۍ د تاريخي ساحو د ترميمولو د کار بهير وکوت
د اطلاعاتو او فرهنګ وزارت د فرهنګ او هنر معين پوهاند محمد رسول باوري پرون د بلخ ولايت د بلخ ولسوالۍ د تاريخي آبداتو د ترميمولو د کار بهير وکوت.
د باختر آژانس خبريال خبر له مخې، د بلخ ولايت د بلخ ولسوالۍ د تاريخي آبداتو د ترميمولو کار، له ١٣٩٥ کال راپدېخوا د آغاخان فرهنګي دفتر د امريکا د متحده ايالاتو او د آلمان فدرالي جمهوريت په مالي همکارۍ پيل کړى او لا هم دوام لري.
پوهاند باوري د ٩-ګُنبد جومات، خواجه عکاشه ولي او د بلخ د تاريخي دېوالونو د ساتنې او ترميمولو د کار بهير په داسې حال کې وکوت چې د آغاخان د فرهنګي دفتر مسوول په دې باب توضيحات وړاندې کول.
د يو بل خبرله مخې:
پوهاند محمد رسول باوري پرون له غرمې وروسته د بلخ د اطلاعاتو او فرهنګ رياست بېلابېلې څانګې وکتلې او د دغه رياست کارونه يې ګټور وبلل.
