د اطلاعاتو او کلتور رياست او رسنيو ترمنځ د همغږۍ ناسته تر سره شوه

تېره ورځ د ننګرهار ولایت د اطلاعاتو او کلتور رئيس مولوي نور محمد حنيف په مشرۍ د رسنیو له مسؤلینو سره د همغږۍ ناسته تر سره شوه، چې پکې د دغه ولایت د علماوو شورا مرستيال مولوي لعل محمد صديقي، د امر باالمعروف او نهي عن المنکر رياست استازي مولوي سيد عمران شهيد، د دولتي ادارو وياندويانو، خبريالانو او د رسنيو مسؤلينو ګډون کړی و.
د غونډې په پيل کې د امر باالمعروف رياست استازي په خپلو خبرو کې د رسنيو استازو ته د اسلامي او افغاني ارزښتونو ته په کتو په نشراتي برخه کې سپارښتنې وکړې.
ورپسې د علماوو شورا مرستيال په خپلو خبرو کې وويل: رسنۍ زموږ د خلکو او نظام لپاره ډېر ارزښت لري، بايد رسنۍ د خپل شته نظام او خلکو لپاره داسې څه خپاره کړي، چې د دې هېواد له دين او کلتور سره برابر وي.
د اطلاعاتو آمر مولوي صديق الله قريشي په خپلو خبرو کې وويل: د ننګرهار اطلاعاتو او کلتور رياست د اطلاعاتو آمريت تل هڅه کړې؛ تر څو د ژورنالېزم له اصولو سره سم خپلو خلکو او رسنيو ته په خپل وخت معلومات ورکړي او دوی ته داسې امکانات او اسانتياوې برابرې کړي، چې خلکو ته کره معلومات وړاندې کړي.
ورپسې د رسنيو استازيو، خبريالانو، د دولتي ادارو وياندويانو او مسؤلينو خپلې ستونزې او نظريات شريک کړل، چې د ښاغلي حنيف له لوري ورته د ستونزو د حل په برخه کې ډاډ ورکړل شو.

۱۴۴۵/۱/۲۲ هـ ق
۱۴۰۲/۵/۱۷ هـ ش