په سرپل ولایت کې د قرانکريم درې ورځنی نندارتون جوړ شو

نن پنجشنبه ۱۴۴۴/۹/۲۲ هـ ق، د سرپل ولایت د اطلاعاتو او کلتور ریاست له لوري د روژې مبارکې میاشتې په مناسبت د ياد ریاست د غونډو په تالار کې د قرانکريم درې ورځنی نندارتون جوړ شو.
یاد نندارتون د اطلاعاتو او کلتور ریاست د کلتور او ګرځندوی آمریت له لوري د ګڼو دولتي ادارو د رئيسانو، علماوو،فرهنګیانو او ځوانانو په موجودیت کې پرانستل شو.
د اطلاعاتو او کلتور رئیس مفتي عمیر سرپلي وویل، د نندارتون څخه يې هدف د سرپل خلک د قرانکریم تلاوت ته هڅول دي،د نوموړي په وینا په نندارتون کې یې لسګونه ټوکه مختلف ډوله چاپي قرانکریمونه،پخواني په لاس لیکل شوي قرانکریمونه او تفاسیر نندارې ته وړاندې کړي دي،چې د سرپل خلک ترې لیدنه وکړي او ګټه ترې واخلي. 
د امربالمعروف او نهی عن المنکر ریاست رئیس مولوي مسعود حنفي د قرانکريم د نندارتون په جوړولو خوښي څرګنده کړه او خلک یې د قرانکريم د معنی او مفهوم سره په يادولو مکلف وګڼل. 
د نندارتون نورو ګډونوالو هم د اطلاعاتو او کلتور ریاست څخه د قرانکریم  د نندارتون په جوړولو مننه وکړه او د ورته نورو نندارتونو د جوړولو هیله یې وکړه.