سرپل ولایت کې سیمه ییزو ادارو ته د مطبوعاتي مسؤلینو تر معرفت وروسته د همږغۍ لومړۍ غونډه تر سره شوه

تېره ورځ په سرپل ولایت کې د اطلاعاتو او کلتور ریاست له لوري سیمه ییزو دولتي ادارو ته د مطبوعاتي مسؤلینو تر معرفت وروسته د همږغۍ لومړۍ غونډه تر سره شوه. 
 د غونډې په پیل کې د سرپل ولایت د اطلاعاتو او کلتور رئیس مفتي عمر سرپلي وویل، د خبریالانو، رسنیو او د افغانستان د خبریالانو د کمیټې د مشر د غوښتنې په اساس مو پخوا له رياستونو څخه غوښتي و، چې خپل مطبوعاتي مسؤلین دې د اطلاعاتو او کلتور رياست ته ور وپېژني، تر څو د خبريالانو لاس رسی اطلاعاتو ته په آسانۍ سره وشي، چې په بریالیتوب سره دا کار ترسره شو.
 ښاغلي سرپلي د ټولو اداري مسؤلينو څخه وغوښتل، چې د دې رياست له خبريالانو سره دې د خپلو ادارو د خبرونو او راپورونو په شریکولو کې همکاري وکړي.
 ورپسې په سرپل کې د افغان خبريالانو د کمېټې مشر غلام سخي فروتن د سرپل ولايت د اطلاعاتو او کلتور رياست د دغه نوي اقدام هرکلى وکړ او زیاته یې کړه، چې د رياستونو او ادارو د مطبوعاتي مسؤلينو او خبريالانو ترمنځ د همغږۍ په صورت کې موږ کولاى شو معلوماتو ته په آسانۍ سره لاسرسى پيدا کړو او دا زموږ د رسنيو فعاليتونه ډېر اسانه کوي.
 ورپسې د یادو ادارو مطبوعاتي مسؤلینو خپل نظریات او وړاندیزونه وړاندې کړل او په دې برخه کې یې د اطلاعاتو او کلتور ریاست سره د همکارۍ ژمنه وکړه.

۱۴۴۴/۹/۱۹ هـ ق 
۱۴۰۲/۱/۲۱ هـ ش