د کتابونو ارزونې کمېسیون غونډه ترسره شوه
نن دوشنبه ۱۴۴۴/۷/۸ هـ ق د اطلاعاتو او فرهنګ وزارت د نشراتو معينيت کې د نشراتو معین مهاجر فراهي په مشرۍ د کتابونو د ارزونې کمېسیون غونډه ترسره شوه، چې پکې د اطلاعاتو او فرهنګ وزارت د بیهقي ریاست رئيس ځانواک مفتي زاده، د لوړو زده کړو وزارت د بهرنيو هيوادونو د تحصيلي اسنادو ارزونې او معادلت رياست رئیس مولوي احمد تقي او د کمېسيون نورو غړو ګډون کړی ؤ.
غونډه د قرآن کريم په مبارکو آياتونو پیل شوه، ورپسې د نشراتو معين ښاغلي مهاجر فراهي د یاد کمېسيون کارونه مثبت ارزیابي کړل او د کمېسيون فعاليتونه يې وستايل او د لا ښه والي توصيه يې ورته وکړه.
همدا راز په یاده غونډه کې د مختلفو کتابونو ارزونه او کتنه وشوه، هغه کتابونه، چې د اسلامي ارزښتونو او افغاني عنعناتو سره سم ول، د چاپ او نشر اجازه ورکړل شوه.
