کندز کې د ښوونځیو زدهکوونکو سره د مطالعې او کتاب لوستنې فرهنګ د ودې په موخه فرهنګي غونډه وشوه
د کندز ولایت د اطلاعاتو او فرهنګ ریاست د یوه خصوصي ښوونځي په همکارۍ، د دغه ولایت په عامه کتابتون کې د ښوونځیو د زدهکوونکو ترمنځ د مطالعې د فرهنګ د ودې په موخه فرهنګي غونډه وشوه.
د ځوانانو چارو آمر قاري داد محمد منصور د علم او پوهې پر ارزښت خبرې وکړې او له ځوانانو څخه یې وغوښتل، چې مطالعه خپل عادت وګرځوي، ترڅو یې علمي کچه لا لوړه شي. ښاغلي منصور زیاته کړه، چې ځوانان د ټولنې ملا تیر دي او باید ځانونه د علم او پوهې په ګاڼه سمبال کړي او د هېواد په ابادۍ او پرمختګ کې خپل مسوولیت ادا کړي.
دغه راز، د فرهنګ او هنر آمر احمد جاوید رنجبَر د مطالعې کولو د لارو چارو په اړه خبرې وکړې او ویې ویل: د دې پروګرام موخه مطالعې ته د زده کوونکو هڅول او د مطالعې د فرهنګ پراختیا دي.
ښاغلي رنجبر زیاته کړه، چې د زدهکوونکو ترمنځ د مطالعې د فرهنګ عامول کولای شي، په ټولنه کې د یوې باخبره، لوستې او نوښتګرې نسل د روزنې زمینه برابره کړي.
ورته مهال، د یاد خصوصي ښوونځي مسوولینو د دغه پروګرام د جوړولو له امله د اطلاعاتو او فرهنګ ریاست څخه مننه وکړه او د دا ډول غونډو پر دوام یې ټینګار وکړ. دوی د ښوونځیو زدهکوونکو ته د تاریخي او فرهنګي سیمو د لیدنې لپاره د لا زیاتو فرصتونو د برابرولو غوښتنه هم وکړه.
په دغې غونډه کې یو شمېر ګډونوالو وویل: د کتاب لوستل د معلوماتو د زیاتوالي ترڅنګ، د دوی د لیکلو، خبرو کولو او زدهکړو د پرمختګ په برخه کې مهم رول لري. ګډونوال د فرهنګي پروګرامونو د دوام او د مطالعې په برخه کې د لا زیاتو اسانتیاوو د برابرولو غوښتونکي شول.
۱۴۴۸/۵/۲۹ هـ ق
