د اطلاعاتو او فرهنګ محترم وزیر میدان وردګ ولایت ته سفر وکړ
د اطلاعاتو او فرهنګ محترم وزیر شیخ شیر احمد حقاني میدان وردګ ولایت ته د سفر په لړ کې د دې ولایت د اطلاعاتو او فرهنګ ریاست له بېلابېلو برخو څخه لیدنه وکړه.
ښاغلي حقاني د اطلاعاتو او فرهنګ ریاست له لوري د مجاهد موزیم جوړیدل د یاد ریاست له مهمو لاسته راوړنو څخه وباله او ویې ویل: د مجاهد موزیم د جهاد تاریخ راتلونکو نسلونو ته په ښه توګه ورپېژني او د تاریخي ارزښتونو په ساتنه کې مهم رول لري.
دغه راز د اطلاعاتو او فرهنګ محترم وزیر صاحب د اطلاعاتو او فرهنګ ریاست ترسره کړې هڅې وستایلې او د چارو له ښه والي په موخه یې مسؤلینو ته اړینې سپارښتنې وکړې، نوموړي د میدان وردګو د عامه کتابتون د پاتې چارو د بشپړېدو په برخه کې د پوره همکاریو ډاډ هم څرګند کړ.
ورته مهال د میدان وردګو ولایت د اطلاعاتو او فرهنګ رئیس مولوي حبیب الله مجاهد ښاغلي وزیر صاحب ته د ښه راغلاست ترڅنګ وویل: د مجاهد موزیم په کمو امکاناتو جوړ شوی او څلور برخې لري، چې پکې لرغوني اثار، د مجاهدینو نظامي توکي، د لرغونو کتابونو قلمي نسخې او د شهیدانو اړوند یادګارونه او د شهیدانو نوملړ شتون لري.
۱۴۴۸/۲/۴ هـ ق
