اندخوی ولسوالۍ کې د مخدومقلي فراغي د علمي، ادبي او فرهنګي مقام درناوي په موخه غونډه وشوه
د فاریاب اطلاعاتو او فرهنګ ریاست او د اندخوی ولسوالۍ د فرهنګپالانو او ځوانانو په نوښت او همکاریو په اندخوی ولسوالۍ کې د نامتو ترکمن شاعر مخدومقلي فراغي د علمي، ادبي، فرهنګي او عرفاني مقام د درناوي په موخه غونډه وشوه.
په دغې غونډه کې د اطلاعاتو او فرهنګ رئیس د مخدومقلي فراغي د شخصیت، افکارو او ارزښتمنو اثارو په اړه وینا وکړه. د اطلاعاتو او فرهنګ رئیس همدارنګه د عالیقدر امیرالمؤمنین(حفظهالله) د ۱۷مې ګڼې فرمان ګډونوالو ته تشریح کړ او له علماوو کرامو، قومي مشرانو، فرهنګپالانو او د اندخوی د څلورو ولسوالیو له اوسېدونکو څخه یې وغوښتل چې د یاد فرمان د عملي کېدو په برخه کې له سیمهییزو مسوولینو سره هر اړخیزه همکاري وکړي.
د اطلاعاتو او فرهنګ رئیس ټینګار وکړ، چې د دغه فرمان په عملي کېدو سره به د واده او د فاتحو د مراسیمو د حج او عمرې له سفرونو د راستنېدو او نورو ټولنیزو غونډو کې ګڼ ناوړه دودونه او ډېر بې ځایه لګښتونه کم شي او د خلکو د لا ښه هوساینې لپاره به زمینه برابره شي.
ګډونوالو مخدومقلي فراغي د ترک نړۍ له سترو شاعرانو او مفکرینو څخه وباله او د علم، اخلاقو، معنویت، ټولنیز یووالي او د ترکمن ولس د فرهنګي هویت په ساتنه کې یې د نوموړي رول وستایه.
د یادونې وړ ده، چې مخدومقلي فراغي(Magtymguly Pyragy) د اتلسمې میلادي پېړۍ یو ستر ترکمن شاعر، متفکر، عارف او ټولنیز اصلاحکوونکی و، نوموړي د ژورو او له معنا ډکو شعرونو له لارې خلک د علم زدهکړې، یووالي، عدالت، تقوا او ښو اخلاقو ته هڅول. د ښاغلي فراغي اثار یوازې د ترکمنانو ترمنځ نه، بلکې د سیمې د نورو ملتونو ترمنځ هم ځانګړی مقام لري.
۱۴۴۸/۱/۷ هـ ق
