محمد طاهر زهير: د هنرمندانو ستونزې څېړو
د اطلاعاتو او فرهنګ وزارت سرپرست محمد طاهر زهير نن د هېواد له هنرمندانو سره په غونډه کې د هنرمندانو حالت د اندېښنې وړ وباله او د هغوى پر ملاتړ او د هغوى د لارې پر سر د پرتو ستونزو پر څېړنې یې ټينګار وکړ.
هغه زياته کړه چې د هنر د ترویج، لوړولو او ودې په خاطر بايد د هنرمندانو د نظريو او وړانديزونو پر بنسټ هر اړخيزې او څرګندې طرحې وړاندې شي او د هنرمندانو ستونزو ته د څېړنې لارې چارې وموندل شي.
همدارنګه محمد طاهر زهير له هنرمندانو څخه وغوښتل چې په تېره يوه پيړۍ کې د هېواد د موسيقۍ په اړه تحقيق او څېړنه وکړي.
په دې غونډه کې د هنرمندانو رييس فاروق نبي زاده په هېواد کې د موسيقۍ هنر د تاريخ په اړه معلومات ورکړل او ويې ويل: هنرمندان ښه اقتصادي حالت نه لري او د اطلاعاتو او فرهنګ وزارت بايد د هغوى ستونزې وڅېړې چې وکولاى شي په ښه ډول هنري او فرهنګي فعاليتونه ترسره کړي.
کابل/ د کب ۲۰ مه/ باختر
