د هنر او فرهنګ معین د یوه پلاوي په ملتیا د بست تاریخي کلا څخه لیدنه وکړه
د اطلاعاتو او کلتور وزارت د هنر او فرهنګ معین مولوي عتیق الله عزیزي د اوسپنې پټلۍ ادارې د تخنیکي انجینرانو او د هلمند ولایت د اطلاعاتو او کلتور ریاست د مسؤلینو په ملتیا د لښکرګاه ښار اړوند د بست تاریخي کلا څخه لیدنه وکړه.
ښاغلي عزیزي د بست تاریخي کلا پر ارزښت او ساتنه خبرې وکړې او د هلمند ولایت د اطلاعاتو او کلتور ریاست له مسؤلینو څخه یې مننه وکړه، چې یادې تاریخي کلا ته یې ځانګړې پاملرنه کړې ده.
نوموړي د بست تاریخي کلا او ششک سیمو څخه په داسې مهال لیدنه وکړه، چې د ششک حفاظتي چارې د اطلاعاتو او کلتور وزارت له لورې بشپړې شوې دي.
دغه راز د اوسپنې پټلۍ ادارې تخنیکي انجنیرانو د بست کلا څخه د لیدنې پرمهال وویل: د دې لیدنې څخه یې موخه د ریل پټلۍ د لیکې جوړیدو پرمهال د تاریخي ځایونو ساتنه ده، ترڅو تاریخي سیمې زیانمنې نشي.
په ورته وخت کې د اطلاعاتو او کلتور ریاست مسؤلینو ښاغلي عزیزي ته ډاډ ورکړ، چي په هلمند ولایت کي به ټولو تاریخي سیمو ته پاملرنه او ورڅخه به په جدي ډول ساتنه کوي.
۱۴۴۷/۱/۲ هـ ق
