د اطلاعاتو او کلتور وزارت پلاوي بدخشان ته سفر وکړ

شنبه (1۶ شعبان ۱۴۴۶) د اطلاعاتو او کلتور وزارت د ګرځندوی، مالي او اداري چارو معين مولوي قدرت الله جمال په مشرۍ يوه پلاوي بدخشان ولایت ته د خپل سفر په ترڅ کې د اطلاعاتو او کلتور ریاست له بېلابېلو برخو څخه لیدنه وکړه او د دې ریاست فعالیتونه یې مهم او حیاتي وبلل.
د ګرځندوی، مالي او اداري چارو معين مولوي قدرت الله جمال وویل: د محلي حکومت لاسته راوړنې او فعالیتونه باید د دې ریاست د خپرونو له لارې خلکو ته ورسول شي، نوموړي د خپل سفر موخه د اطلاعاتو او کلتور رياست له چارو او کارکوونکو څخه لیدنه، د ستونزو اورېدل او د دې ریاست د کاري لاسته راوړنو ارزونه یاده کړه، ښاغلي جمال د اطلاعاتو او کلتور ریاستونه د محلي حکومت د فعالیتونو ترجمانان او انعکاس ورکوونکي وبلل.
همدا راز د بدخشان د اطلاعاتو او کلتور رياست د هنر او کلتور آمر محمد عارف فاروقي د دې ریاست د تأسیس، د ځوانانو، کلتور، هنر، اطلاعاتو او ګرځندوی د امریتونو د کاري استقامتونو په اړه يې مفصل معلومات ورکړل او د بدخشان د تاریخي آبداتو د ساتنې لپاره یې د پاملرنې غوښتنه وکړه.
ښاغلي فاروقي وویل: په بدخشان کې ۲۹ تاریخي آبدې،۱۲۰ تفريحي سیمې، ۱۱ راډیوګانې او درې ټلویزیونونه شتون لري، همدارنګه کلتوري پروګرامونه او مشاعرې د فرهنګیانو په همږغۍ په دوامداره ډول ترسره کېږي.

۱۴۰۳/۱۱/۲۷ ل
۲۰۲۵/۲/۱۵ ز