د ځوانانو چارو معین د خصوصي پوهنتونونو له رئیسانو او استازو سره وکتل
د اطلاعاتو او کلتور وزارت د ځوانانو چارو معین قاري محمد یونس راشد نن په خپل کاري دفتر کې د هېواد د لسو خصوصي پوهنتونونو له رئیسانو او استازو سره وکتل.
ښاغلي راشد په خصوصي پوهنتونونو کې د زده کوونکو د کمیت پر ځای پر لوړ کیفیت ټینګار وکړ او زیاته یې کړه دا پر مونږ لازم دي، چې د ځوانانو خدمت وکړو او په اسلامي روحیه د دوی روزنه وکړو.
د ښاغلي راشد په خبره، د ځوانانو چارو معینیت تر دې دمه پورې د هېواد له بېلابېلو پوهنتونونو سره په ژمني او بهاري سمسترونو کې د زده کړیالانو د اقتصادي ستونزو د حل په موخه د تخفیف تړونونه لاسلیک کړي دی او دا لړۍ به د هېواد ټولو خصوصي پوهنتونونو ته وغځول شي.
د يادې غونډې په ترڅ کې د خصوصي پوهنتونو رئیسانو او استازو د خپلو خبرو پرمهال د ځوانانو چارو معینیت له کړنو څخه خوښي څرګنده کړه او زیاته يې کړه، تېر ته په پام سره اوسمهال د ځوانانو لپاره په پراخه کچه ملاتړ او فکري سمون د اسلامي ارزښتونو په چوکاټ کې رامنځته شوي دی.
دوی د خصوصي پوهنتونو هغه ستونزې چې اوسمهال دوی ورسره مخ دي، له معین صاحب سره شریکې کړې او د همکارۍ غوښتنه یې وکړه، چې د معین صاحب لخوا ورسره د هر ډول همکارۍ ژمنه وشوه.
۱۴۴۵/۴/۷ هـ ق
۱۴۰۲/۷/۳۰ هـ ش
