کندز کې کورنيو او بهرنيو سیلانيانو ته اسانتیاوې رامنځته کېږي
د کندز ولايت د اطلاعاتو او کلتور رياست له لوري د يو هيئت په ټاکلو سره د هغو تفريحي سيمو کروکي او سکيج ترسره کېږي، چې د سيلانيانو پام ځانته راګرځوي او د سیل او سياحت لپاره مناسبې سيمې دي.
د اطلاعاتو او کلتور رياست د ګرځندوی آمر او د ياد هيئت مشر محمد شعیب رحيمي وویل: دا چې په هېواد کې د اسلامي امارت په راتګ سره په تمامه معنی ډاډمن امنیت تامين شوی، د اطلاعاتو او کلتور ریاست هڅه کوي چې د دغه لوی نعمت څخه په ګټې اخيستنې سیلانیانو ته هم د پام وړ خدمت ترسره کړي، ترڅو کورني او بهرني سیلانیان وکولای شي، چې په کندوز کې له بېلابېلو تفریحي سيمو څخه په اسانۍ لیدنه ترسره کړي.
رحيمي زیاته کړه؛ تر دې مهاله د کندز په مرکز کې د بالاحصار تاريخي تپه، د حاجي شهید، تخارستان او ساقي بايي تاريخي جوماتونو سربېره په خانآباد، امامصاحب ولسوالۍ او همدا راز شېرخان بندر هغه تفریحي سیمې سکېج شوي چې له امله یې سیلانیان ترې په آسانۍ لیدنه وکړي، په روان کال کې تراوسه پورې له بېلابېلو اروپايي، امریکايي او اسیايي هېوادونو څخه شاوخوا ۳۳۰ تنه بهرني سیلانیان د سیاحت په موخه راغلي او د کندز له تفریحي سیمو څخه د لیدلو ترڅنګ د هېواد مختلفو ولایتونو ته ور پېژندل شوي دي.
د یادونې وړ ده چې په کندز ولايت کې د پاتې تفريحي او سیاحتي سیمو د سکېج او کروکي ترسره کولو لړۍ دوام لري.
۱۴۴۶/۶/۲۹ هـ ق
۱۴۰۳/۱۰/۱۱ هـ ل
