کندز کې د رسنيو له مسؤلينو، خبريالانو او د امارتي ادارو له وياندويانو سره د همږغۍ غونډه وشوه
کندوز ولايت کې د ولایت مقام د دفتر رئیس په مشرۍ د اطلاعاتو او کلتور ریاست په همږغۍ د رسنيو له مسؤلينو، خبريالانو او د امارتي ادارو له وياندويانو سره د همږغۍ غونډه وشوه.
د اطلاعاتو او کلتور رئیس ګل محمد الیاس په خپلو خبرو کې د رسنیو په مسؤلیتونو او اهمیت خبرې وکړې او ويې ویل: اوس وخت کې د یوې ټولنې د اصلاح لپاره او په ځانګړي ډول د اسلامي امارت د فعالیتونو په انعکاس کې خبریالان او رسنئ عمده رول لوبوي، چې تر دې دمه په کندز ولايت کې خبریالانو او رسنيو خپل رسالت په ښه توګه سرته رسولی، ښاغلي الیاس د خپلو خبرو په لړ کې د ټولو سیمه ییزو رسنیو او خبریالانو ستونزې له ولایت مقام او د اړوندو ادارو له مسولینو سره شریکې کړې.
د رسنيو مسؤلينو او خبريالانو وویل: سیمه ییزې رسنئ په خپله برخه کې د امارتي ادارو فعاليتونو او لاسته راوړنو ته په ښه توګه انعکاس ورکوي، دوی همدا راز له ولايت مقام او اړوندو ادارو څخه د شته ستونزو د هواري غوښتنه وکړه.
د ولایت مقام د دفتر رئیس د ټولو امارتي ادارو له مسولینو غوښتنه وکړه، چې له رسنيو سره د فعالیتونو شریکولو ترڅنګ تر خپل وس او توانه پورې په خپله اړونده برخه کې مرسته او همکاري وکړي.
۱۴۴۶/۹/۱۲ ق
۱۴۰۳/۱۲/۲۲ ل
