کلتوري پلاوي په چک ولسوالۍ کې د یو لرغوني مسجد څخه ليدنه وکړه
د ميدان وردګو ولايت د اطلاعاتو او کلتور ریاست کلتوري پلاوي د چک ولسوالۍ له تاريخي آبدو څخه د ليدنې په لړ کې له یو لرغوني مسجد څخه ليدنه وکړه.
یاد مسجد د چک ولسوالۍ نيک پایکول درې په زويه کلي کې د چهل ګزيانو هدیرې په نوم سيمه کې موقعيت لري، چې د چهل ګزي زیارت تر څنګ سلګونه کاله وړاندې ودان شوی دی.
د ليدنې پر مهال د اطلاعاتو او کلتور ریاست د کلتور او ګرځندوی آمر شفيق الله فضلي وويل: لرغوني مساجد د الله تعالی کور او زموږ د تېر کلتور او تمدن نښې دي، دا چې ياد جومات ډېر پخوا جوړ شوی، نو د سيمې له خلکو مو غوښتنه ده چې ترې ساتنه وکړي.
د يادونې وړ ده، چې اطلاعاتو او کلتور ریاست په تېر يو کال کې د ميدان وردګو ولايت په يو شمېر ولسواليو کې لسګونه تاريخي آبدې ثبت کړي، چې پکښې لرغوني زیارتونه، تاريخي کلاګانې، مساجد او د کوشانیانو د وخت سټوپې شاملې دي.
۱۴۴۶/۳/۱۸ هـ ق
۱۴۰۳/۶/۳۱ هـ ل
