پکتیا کې نوښتګر ځوانان د یوې غونډې په ترڅ کې وستایل شول

د پکتیا ولایت د اطلاعاتو او کلتور ریاست ځوانانو چارو آمریت له لوري د الکوثر فکري او فرهنګي ادارې په همکارۍ د دغه ولایت هغه نوښتګر ځوانان، چې په کمو امکاناتو یې ډول ډول کاریدونکي توکي او تجهیزات جوړ کړي وو، وستایل شول.
د ځوانانو چارو آمر د غونډې ګډون کوونکو ته د ښه راغلاست ویلو تر څنګ د معیاري نوښتونو په اړه د ځوانانو معینیت لخوا جوړ شوي طرزالعمل هم تشریح کړ.
د پکتیا اطلاعاتو او کلتور رئیس مولوي ثواب جان اسلامیار د نوښتګرو ځوانانو ترسره کړې کړنې وستایلې او غوښتنه یې وکړه، چې خپلې هڅې لا زیاتې کړي ترڅو په نورو برخو کې هم نوښتونه وشي.
دغه راز د اطلاعاتو او کلتور رئیس نوښتګر ځوانانو ته د هر ډول همکاریو پوره ډاډ ورکړ او ویې ویل: د اسلامي امارت مسؤلین نوښتګرو ځوانانو سره د همکاریو ترسره کولو ته ژمن او خپل مسؤلیت یې بولي.
په دغه غونډه کې یو شمېر نورو وینا کوونکو هم د نوښتګرو ځوانانو هڅې او نوښتونه وستایل او د نوښتونو په ارزښت او اړتیا یې خبرې وکړې، وینا کوونکو د ځوان قشر د اهمیت او مسؤولیت په هکله وویل: نن په ټولنه کې د اسلامي نظام ټینګښت په برخه کې ځوانانو ته ستر خدمتونه او مسؤولیتونه متوجه دي، چې باید په ډېر اخلاص سره یې اداء او هېواد ته د نوښتونو او مهارتونو له لارې مثبت او د پام وړ کارونه ترسره کړي.
د یادونې وړ ده، چې د غونډې یوه برخه د نوښتونو نندارې ته ځانګړې شوې وه، چې د ځوانانو له لوري بېلابېل انټرنیتي سایټونه، تخنیکي توکي، د وسایطو بېلګې او تجهیزات نندارې ته وړاندې شول.
۱۴۴۷/۳/۴ هـ ق