پکتيکا کې د امـارت پېژندنې سيالۍ غوره ګډونوال وستايل شول

سه شنبه (۲۴ محرم ۱۴۴۶ ) د پکتيکا ولايت د اطلاعاتو او کلتور رياست د ځوانانو چارو امريت له لوري د پکتيکا د پوهنې ریاست په همغږۍ د جاني خېل او شخیل آباد ولسوالیو له څه باندې (۱۵۰) تنو طالب العلـمانو، زده کوونکو او ځوانانو څخه د امـارت پېژندنې کتاب اخیستل شوې آزموینې پایلې د يوې غونډې په ترڅ کې اعلان او د هرې ولسوالۍ لس تنه ممتاز ګډونوال په بېلابېلو ډالیو ونازول شول.
غونډې ته د خبرو په ترڅ کې د ځوانانو چارو آمر محمد ذاکر ناياب وویل: په ټول توان سره به د ځوانانو د ښې راتلونکې لپاره هڅې کوو، د ځوانانو تر منځ د مطالعې دود پياوړي کولو، سالم رقابت رامنځته کولو او د خپلو اسلافو له تاریخ د خبراوي په موخه به دا ډول سيالۍ ترسره کوو.
د غونډې ویناوالو له اطلاعاتو او کلتور ریاست څخه د مننې ترڅنګ وویل: د ځوانانو د روښانه راتلونکي، علمي او فکـري وړتیا لوړولو په موخه دا ډول پروګرامونه اړین دي، دوی غوښتنه وکړه، څو په راتلونکې کې دې ته ورته نور پروګرامونه او سیالۍهم ترسره شي.
د يادونې وړ ده چې د هرې ولسوالۍ په کچه لومړي مقام ګټونکو ته کمپيوټر، دویم، درېیم او څلورم مقام ګټونکو ته مبايلونه او تر لسم مقام پورې غوره ګډونوالو ته بېلابېلې جايزې او کتابونه ډالۍ ورکړل شول.

۱۴۰۳/۵/۹ ھ ل 
۲۰۲۴/۷/۳۰ ميلادي