په ننګرهار کې د ولایتي ادارو ویاندویانو او رسنیو له استازو سره ناسته تر سره شوه

تېره ورځ د ننګرهار اطلاعاتو او فرهنګ ریاست کې د ياد رياست رئیس قاري نورمحمد حنیف په مشرۍ او د خبریالانو خوندیتوب کمیټې په همکارۍ، د ولايتي ادارو له وياندويانو او د رسنيو له استازو سره ناسته تر سره شوه.
په غونډه کې د اطلاعاتو او فرهنګ رئیس، رسنۍ د هیواد او ملت ژبه وبلله، او د رسنیو له استازو يې وغوښتل، چې ملت او نړیوالو ته د افغانستان اوسنی وضعیت په سمه توګه وړاندې کړي، او په رسنیز ډګر کې د پوچو تبلیغاتو او درواغجنو خبرونو مخه ونیسي، همدا راز يې زياته کړه، چې ژر به په ننګرهار کې یو ګډ کمېسيون رامنځ ته کړي، چې د رسنيو ستونزو ته پر وخت رسيدنه وکړي. 
 په دغه ناسته کې د ختیځ زون د خبریالانو د خوندیتوب کمېټې مشر یوسف ظریفي او د غږیزو رسنیو اتحادیې مشر شفیق الله رحماني او نورو ژورنالېستانو له رسنیو څخه د اطلاعاتو او فرهنګ ریاست دوامداره ملاتړ او هڅو مننه وکړه.
د غونډې په جريان کې د ولایت ویاند قاضي ملا عادل، د امنیې قومندانۍ ویاند حاجي رئیس زابلي، د سرحدي لوا ویاند راشد، استخباراتو ریاست ویاند منصور حبیب زی، دریمې پلې لوا ویاند فخرالدین صدیقي هم په خپلو خبرو کې په دوه اړخیزه همکاریو ټینګار وکړ.

۱۴۴۴/۷/۲۹ هـ ق
۱۴۰۱/۱۲/۱ هـ ش