په ننګرهار کې د ايف ايم راډيوګانو له مسؤلينو سره د ستونزو د حل په موخه ناسته وشوه
د ننګرهار ولایت ايف ايم راډيوګانو مسؤلينو نن د اطلاعاتو او کلتور ریاست د غونډو په تالار کې د یاد ریاست رئیس قاري احسان الله ساجد، د مخابراتو او معلوماتي ټکنالوجۍ رئیس مولوي ذبیح الله ذکي، او د اترا ادارې د ختیځ زون مسؤل رحيم الله شینواري سره د يو شمېر ستونزو د حل په موخه ناسته وکړه.
د ناستې په پيل کې د اطلاعاتو آمر مولوي صدیق الله قریشي د ناستې اجنډا ګډونوالو ته وړاندې کړه او زیاته یې کړه، چې حکومت په ځانګړې توګه د اطلاعاتو او کلتور وزارت د رسنيو د ملاتړ او همکارۍ لپاره ژمن دی.
د خبریالانو د خوندیتوب کمیټې مسؤل محمد آصف شینواري د ايف ايم راډيوګانو غوښتنې او ستونزې شریکې کړې او غوښتنه يې وکړه، چې د دوی ستونزې له اړوندو مرکزي ادارو سره شریکې کړي.
په پای کې مسؤلینو د همکارۍ ډاډ ورکړ او زیاته یې کړه، چې د ايف ايم راډيوګانو ټولې غوښتنې او ستونزې به مرکزي ادارو ته د حل په موخه وړاندې شي.
۱۴۴۶/۶/۲۳ ھ ق
۱۴۰۳/۱۰/۵ ھ ل
