په لوګر کې د ۸۰۰ زده کوونکو لپاره درې میاشتنی ښوونیز پروګرام پیل شو

د لوګر ولايت د اطلاعاتو او کلتور ریاست اړوند ښوونیز مرکز کې د حاجي منګل ښوونیز مرکز په مالي ملاتړ درې میاشتنی ژمنی پروګرام پیل شو.
د ځوانانو چارو آمریت د همغږۍ مدیر محمد کریم عباسي د یاد پروګرام په اړه وویل: سږ کال به شاوخوا ۸۰۰ نوي زده کوونکي، ځوانان او زده کړیالان د انګلیسي ژبې، کمپیوټر، ویناوالۍ او خطاطۍ په برخو کې زده کړې وکړي.
د اطلاعاتو او کلتور رئيس دوکتور رفیع الله صمیم د حاجي منګل ښوونیز مرکز د مسؤلینو له هڅو مننه وکړه او نویو زده کوونکو ته یې وویل: د ښوونيز مرکز ټول امکانات د دوی د ښوونې او روزنې لپاره برابر شوي دي، نوموړي له زده کوونکو وغوښتل، چې د خپلو استعدادونو د لوړولو لپاره له وخت څخه ښه ګټه پورته کړي.
همدارنګه، دوکتور صميم د ارواښاد حاجي منګل ښوونیز مرکز ترسره شوي خدمتونه وستایل او له نورو سوداګرو او شتمنو یې وغوښتل، چې د ځوانانو د روزنې لپاره ورته پروګرامونه جوړ کړي.
د یاودونې وړ ده، چې د دې مرکز له پسرلني پروګرام څخه هم سږ کال شاوخوا ۵۰۰ زده کوونکي فارغ شوي دي.

۱۴۴۶/۶/۲۲ هـ ق
۱۴۰۳/۱۰/۴ هـ ل