په جوزجان کې ځوانانو د اسلامي نظام په ملاتړ غونډه وکړه
تېره ورځ په جوزجان ولایت کې ځوانانو د اسلامي نظام په ملاتړ غونډه وکړه.
یاده غونډه د دغه ولایت د اطلاعاتو او کلتور ریاست د ځوانانو چارو د آمریت له لوري د دغه ولايت په فيض آباد ولسوالۍ کې د اسلام او د قرانکريم د سپيڅلي ارزښت څخه د ملاتړ او دفاع تر سرليک لاندې جوړه شوې وه، چې پکې د ګڼ شمېر ځوانانو په شمول د فيض آباد ولسوالۍ ولسوال مولوي شکرالدين رفيع، د اطلاعاتو او کلتور رياست رئیس او د ځوانانو چارو آمر انجنير پهلوان بابري ګډون درلود.
غونډه کې يو شمېر ځوانانو د خپلو خبرو په ترڅ کې د اسلامي نظام د دفاع په اړه څرګندونې وکړې او ویې ویل: امارت د اخوت، ورورولۍ او اتحاد کور دی، موږ یې په بشپړ ډول ملاتړ کوو.
دغه راز د فيض آباد ولسوالۍ ځوانانو د اطلاعاتو او کلتور له رئيس څخه وغوښتل، چې په دې ولسوالۍ کې يو کتابتون جوړ کړي، ترڅو د دغه ولايت ځوانان ترې ګټه پورته کړي، د یاد ولایت د اطلاعاتو او کلتور رئیس مولوي سیف الدین معتصم ډاډ ورکړ، چې د دوی وړاندیزونه او ستونزې به د اسلامي امارت تر مسؤلینو رسوي.
۱۴۴۵/۱/۲۳ هـ ق
۱۴۰۲/۵/۱۸ هـ ش
