پروان کې د موزيم پيژندنې یو ورځنی سیمینار جوړ شو
د پروان ولایت اطلاعاتو او کلتور ریاست د موزيم لوی مدیریت له لوري د ځایي موزيم د آثارو د تشرېح او توضېح په موخه د موزيم پيژندنې یو ورځنی سیمینار جوړ شو، چې د اطلاعاتو او کلتور رياست د مسؤلينو تر څنګ ګڼ شمېر ځوانانو او زده کوونکو پکې برخه اخستې وه.
د فرهنګ او ګرځندوی آمر عتيق الله صافي د سیمینار ګډون والو ته د ښه راغلاست ويلو ترڅنګ د یاد سیمینار موخه د لرغونو آثارو په اړه ځوانانو ته عامه پوهاوی، د پروان د ځايي موزيم د شته آثارو توضېح او پیژندنه ياده کړه او زياته يې کړه چې لرغوني آثار د تیرو تاریخي پړاوونو د ژوند رښتینی انځور څرګندوي.
ورپسې د اطلاعاتو آمر رحمت الله رحیمي د موزيم د جوړېدا اصلي موخه د لرغونو آثار ساتنه، رغونه او علمي ګټه اخیستنه یاده کړه او ويې ويل موزيم د یوې کره سرچينې په توګه د تاريخ ليکنې برخه کې خورا اړینه ونډه لري.
همداراز د سیمینار یو تن ګډونوال سردار امین د یاد سیمينار په جوړېدو خوښي څرګنده کړه او ويې ويل: د داسې سيمينارونو جوړول د ځوانانو ظرفیت لوړونې لپاره خورا اړین دي او له ځوانانو یې وغوښتل چې د ځایي موزيم څخه لیدنه وکړي.
هېره دې نه وي چې د سیمینار په پای کې ګډون والو د پروان ځايي موزيم څخه لیدنه وکړه او د موزيم د مسؤلینو له لوري ورته شته آثار تشرېح او توضېح کړای شول.
۱۴۴۵/۵/۱۹ هـ ق
۱۴۰۲/۹/۱۲ هـ ش
